Summer season essay
ଗ୍ରୀଷ୍ମ ଋତୁ:-
ଉପକ୍ରମ:-
ବର୍ଷର ବାର ମାସ ଓ ଛଅ ଋତୁ | ସେଥିମଧ୍ୟରୁ ଗ୍ରୀଷ୍ମ ଋତୁ ଅନ୍ୟତମ | ଏହା ବସନ୍ତ ଋତୁ ପରେ ଆସେ | ବୈଶାଖ ଓ ଜ୍ୟେଷ୍ଠ ମାସକୁ ଗ୍ରୀଷ୍ମ ଋତୁ କୁହାଯାଏ | ଭାରତ ଏକ ଗ୍ରୀଷ୍ମ ପ୍ରଧାନ ଦେଶ ହୋଇଥିବାରୁ ଏହି ଋତୁ ଅନେକ ଦିନ ଧରି ଏଠାରେ ଅନୁଭୂତ ହୋଇଥାଏ |
ବର୍ଣ୍ଣନା:-
ଏହି ଋତୁରେ ସୂର୍ଯ୍ୟକିରଣ ସିଧା ଭାବରେ ପୃଥିବୀ ଉପରେ ପଡିଥାଏ | ତେଣୁ ବହୁତ ଗରମ ହୁଏ | ଜୀବଜନ୍ତୁ,ଗଛଲତା,ମଣିଷ ସମସ୍ତେ କଷ୍ଟ ପାଆନ୍ତି | ଏହି ଋତୁରେ ଭୀଷଣ ଖରା ହୁଏ | ନଦୀ,ନାଳ,ପୋଖରୀ ଆଦିରୁ ପାଣି ଶୁଖିଯାଏ | ତେଣୁ ଚାରିଆଡେ ପାଣିର ଅଭାବ ଦେଖାଦିଏ | ପାଣିପାଇଁ ଲୋକମାନେ ଓ ଜୀବଜନ୍ତୁ ଡହଳବିକଳ ହୁଅନ୍ତି |ମାଧ୍ୟାନରେ ଗରମ ପବନ ବହେ | ଟାଣ ଖରାରେ ବାହାରକୁ ବାହାରିବା କଷ୍ଟ ହୁଏ | ଏହି ଋତୁରେ ଦିନ ବଡ ଓ ରାତି ସାନ ହୁଏ | ସମୟ ସମୟରେ ଧୂଳିଝଡ ହୁଏ | ଦେହରୁ ବେଶି ଝାଳ ବହେ | କୌଣସି କାମ କରିବାକୁ ଇଛା ହୁଏ ନାହିଁ | ଘରପୁଡ଼ି ମଧ୍ୟ ଘଟେ | ଏଥିପାଇଁ ଅନେକ ଧନ ଜୀବନ ନଷ୍ଟ ହୁଏ | ଲୋକମାନେ ଗରମରୁ ରକ୍ଷା ପାଇବାପାଇଁ ବିଜୁଳିପଙ୍ଖା,କୁଲର ଏବଂ ଏ.ସି ଆଦି ବ୍ୟବହାର କରନ୍ତି | ଏହି ସମୟରେ ଥଣ୍ଡା ଜିନିଷ ଖାଇବାକୁ ଓ ଥଣ୍ଡା ପାଣି ପିଇବାକୁ ଭଲପାଆନ୍ତି | ଏହି ଋତୁରେ ଦୀର୍ଘଦିନ ଧରି ସ୍କୁଲ,କଲେଜ ଓ କୋର୍ଟ କଚେରୀ ବନ୍ଦ ରହେ | ଏହି ଋତୁରେ ଆମ୍ବ,ପଣସ,ସପୁରି,ସପେଟା,ଖଜୁରୀ ଆଦି ଫଳ ପାଚେ ଏବଂ ମଲ୍ଲୀ,ଚମ୍ପା,ମାଳତୀ,ବଉଳ,ନାଗେଶ୍ୱର ଆଦି ସୁବାସିତ ଫୁଲ ଫୁଟେ | ବହୁ ପରିଶ୍ରମ କରି କୃଷକ ମାନେ ବାଡ଼ିବଗିଚାରେ ବାଇଗଣ,ଭେଣ୍ଡି,ଟମାଟୋ,କଲରା,ପୋଟଳ ଆଦି ପନିପରିବା ଚାଷ କରିଥାନ୍ତି |
ପର୍ବପର୍ବାଣି:-
ଅସହ୍ୟ ଉତ୍ତାପ ସତ୍ତ୍ୱେ ଗ୍ରୀଷ୍ମ ଋତୁର ପର୍ବପର୍ବାଣି ପଲ୍ଲୀଜୀବନକୁ ସରସ ଓ ମଧୁମୟ କରିଥାଏ | ଅଖୟ ତୃତୀୟା,ରଜ,ସ୍ନାନପୃର୍ଣିମା,ଚନ୍ଦନଯାତ୍ରା,ପଣାସଂକ୍ରାନ୍ତି,ସାବିତ୍ରୀଅମାବାସ୍ୟା ଇତ୍ୟାଦି ଏହି ଋତୁର ପ୍ରଧାନ ପର୍ବ | ଏହି ପର୍ବ ଗୁଡିକ ଉତ୍କଳର ପୁରପଲ୍ଲୀରେ ମହାସମାରୋହରେ ପାଳିତ ହୋଇଥାଏ |
ଉପସଂହାର:-
ଋତୁଚକ୍ରରେ ଗ୍ରୀଷ୍ମଋତୁ ସ୍ଥାନ ପ୍ରଥମ | ପ୍ରାଣୀ ଓ ଗଛଲତା ପାଇଁ ଏହି ଋତୁ ଦୁଃଖଦ ହେଲେ ମଧ୍ୟ ପରୋକ୍ଷରେ ପ୍ରୀତି,ପ୍ରଶାନ୍ତି ଓ ପୁଲକ ଆଣିଥାଏ |ଏହି ଋତୁ ବର୍ଷା ଋତୁକୁ ନିମନ୍ତ୍ରଣ ଜଣାଇ ଧରାପୃଷ୍ଠରୁ ବିଦାୟ ନିଏ | ଅସହ୍ୟ ଗ୍ରୀଷ୍ମ ପ୍ରବାହ ସତ୍ତ୍ୱେ ବିଭିନ୍ନ ପର୍ବପର୍ବାଣି ତଥା ଫୁଲଫଳର ବହୁଳତା ପଲ୍ଲୀ ଜୀବନକୁ ସରସ,ସୁନ୍ଦର ଓ ମଧୁମୟ କରିଥାଏ | ବଳରାମ ପ୍ରଧାନ jobalert360.com